[am專訪]黃錢其濂：香港處於最危險時刻
(2012年08月20日)

港英政府年代，曾有一位「政壇鳳凰女」，官拜至衛生福利司，當年在公務員本地化政策下，因不願放棄新西蘭國籍而掛冠求去，並毅然出戰立法局「新九組」，以票后身份入局，開創了棄官從政的先河。75歲的黃錢其濂，多年來退而不休，更搖起筆桿出版多本著作，她近年埋首撰寫個人回憶錄，並會將下月立法會選舉後的最新形勢收入書中，她形容，「香港依家係最危險時刻」，立法會議席重新「洗牌」，將可窺見香港將來政治形勢。 文：鄭秀韻　攝：鍾式明   因姓名諧音換來「鮮忌廉」暱稱的黃錢其濂，友儕間稱呼其洋名Libby。Libby前年從澳洲回流香港定居，照顧中風的丈夫，除了充當愛夫的「貼身看護」，生活毫不清閒，她的名片冠以作家稱號，多年出書從未間斷，她並教年輕學子英文，更關心時局發展，不時公開月旦政事，並無因脫離政圈而落伍。   吵鬧是普選前奏不覺亂  移居澳洲多年，慣了寧靜生活的Libby，記者問她香港是否很吵鬧，她說：「吵吵鬧鬧是的，熱鬧也是的，但我覺得係好現象，因為呢個係普選之前嘅前奏，呢個係好重要，我亦好開心見到啲年輕人出聲……」她續說，「我覺得香港唔係人哋所謂嘅亂，好多人話依家好似七國咁亂，亂唔係咁嘅，有人食飽飯、有嘢做、有書讀、有聲出，就唔會亂，你冚住任何嘢就會爆炸，香港唔係嗰種情況……」她眼中的香港雖未臻十全十美，但認為大有前途，唯一美中不足是很多地方退步了，「譬如英文水平真係不存在……」 香港近年貧富懸殊日益嚴重，曾任社會福利署長的Libby說，香港一向有貧富懸殊問題，「一個貧富懸殊嘅社會可能產生不安定」，但貧富懸殊並非不能改善，尤其香港人有拼力，「我知道貧富懸殊是甚麼理由，就係政府瞌眼瞓，邊個瞌眼瞓呢，曾特首(曾蔭權)，冇咗中間嗰層居屋，呢個係我哋成功之道，忽然間冇咗，有冇搞錯……」說來有火的Libby稱，「地產霸權嗰種口號，都係來自政府唔醒目，睇唔到公私(房屋)要分開、睇唔到居屋嘅重要性……」Libby兩年前返港時曾去信財政司長曾俊華反映意見，結果當然石沉大海。   對官員「瞌眼瞓」感沮喪 她直言香港政府失去直覺(sensitivity)，令曾是政府一分子的Libby深感沮喪，至於官員「瞌眼瞓」的原因，「希望唔係懶理，(唔係怕)做多錯多所以唔做，(做官)一定要分辨是非。」曾是前特首曾蔭權上司的Libby，談起這位昔日下屬所涉的貪婪行為，形容「連好人都變到我唔認識」，她比喻說，「好似一個情人變咗心，你忽然間知道個打擊好大，令我好沮喪！」 話題當然離不開新政府，Libby劈頭便說要給機會梁振英，「好多傳媒話佢係共產黨，我冇證據就唔會冤枉人，佢話唔係我咪信佢先囉，但一錯兩錯，佢係咪醒目，我都有啲懷疑……」她指梁振英大宅僭建並非大罪，「係誠信嘅考驗，透過呢個睇你可唔可信。」 對於梁振英提出的「大和解」，她指似乎至今還未起步，「Exco(行政會議)如果『圍威喂』，做唔到嘢嘅，係人都講漂亮說話，但認同你嘅說話唔代表係啱嘅，要聽各種說話，尤其唔想聽嘅最要聽得緊要。」她指英國人可在香港站穩150年，「就係因為佢哋醒目，知道佢啲仇人喺邊度，用行政手段吸納負面聲音。」   梁振英需以行為「拆彈」  Libby多次提及要給機會梁振英，因為無其他選擇，「梁振英政府要以行為嚟拆彈，人哋懷疑話大陸干預香港政策，你要證明大陸唔係干預……希望梁振英政府由上至下都要執得正，依家未有例子，將來5年梗有例子，希望真係表現到佢係維護香港人嘅利益。」她亦期望梁振英透過左右手協助施政，「佢身邊有好多叻人」，例如政務司長林鄭月娥，「佢(林太)好叻，人好有心，當然佢撞過幾次板，(前發展局長)麥齊光，依家嗰位(現任發展局長陳茂波)似乎過唔到好多人關，因為好似係講大話……」她續說，「我覺得佢(陳茂波)行錯一步，第一步已行錯，佢點會話唔知悉……」高官接二連三出事，「好多人話上樑不正下樑歪，但我唔係咁睇，我覺得佢哋以為可以得過且過……冇政治智慧，唔知人哋會查，一查要認罪要解釋已經唔係好事，人哋始終有個問號，問號喺度就打折扣，你做嘢就好難！」   政制畸形催生半桶水問責制 為官25年的Libby認為做官是好事，但她形容現時的問責制是半桶水，「外國問責制嘅minister(部長)係民選，但香港係委任制，莫名其妙唔知喺邊度出嚟，唔係教育嘅搞教育，唔係專科又搞專科……」一切歸因於香港的政治制度是一個死結，「問題係政治架構畸形，但我始終抱住可能天真態度，香港有今日因為我哋識生存，喺所有矛盾之間搵出一條生路。」 Libby正埋首撰寫新著作《Full Circle》(《回》)，這本回憶錄於6年前下筆，斷斷續續疾書至今只欠一章，為的是等待下月立法會選舉結果，「睇吓邊啲人(政黨)選到，呢個先知道喺依家好困難、矛盾嘅時刻，睇到香港人嘅心意。」作為旁觀者，她指今次選舉十分重要，既可知道香港的前途，亦可見到香港將來政治形勢，「依家係(香港)最危險時刻」，「阿頭成日俾人鬧，連number 2(政務司長)又唔掂，因為兩個人做(發展局)局長(受影響)……」   泛民不過24席將一面倒 她分析稱，泛民主派若取得逾24席，可在議會起平衡作用，「即泛民力量存在，少過24席即係一面倒，香港建制派已經成立，政府會處於強勢，做嘢可能容易啲，所有政策容易過關。」選舉結果如何，下月自有分曉，至於Libby那本由自身出發記載香江變遷、共有十個章節的回憶錄，初步計劃於明年書展才面世。