【am專訪】回首6年心戰室生涯 何安達：香港社會變壓力煲
(2012年07月11日)

曾蔭權治下7年初期打造「心戰室」，銳意強化政治公關工作，但後期卻要為連串火頭拆彈，曾是心戰室要員的前新聞統籌專員何安達，回首6年心戰室生涯，認為社會急劇轉變，傳媒慣常使用「感嘆號」下筆，失卻應有的客觀性，市民的要求亦提高，不住發表個人意見，反映社會已變成「壓力煲」。他並對眾人眼中的「貪曾」有不同評價，認為曾蔭權為香港長遠發展，提出一些明知不受歡迎的政策，可惜最後因政府「工具箱」無票而導致焦頭爛額。  文：鄭秀韻   圖：黃文山 曾任職傳媒的何安達，於06年出任新聞統籌專員一職，與特首辦心戰室其他成員同為曾蔭權作「政治化妝師」，隨著曾蔭權卸任，何安達亦離開政府，他早前接受本報專訪時表示，感覺過去6年香港社會有很大轉變，「以前記者寫嘢唔應該用感嘆號，但依家個lead(導言)基本句句都係感嘆號。」 政府新聞處早前出新聞稿時，將記者向特首梁振英發問首次落區便「落荒而逃」的4字刪去，他同意新聞處不應刪改用字，但質疑，「點解冇人會問為何記者問問題用『落荒而逃』，呢4個字主觀到不得了！」另外，市民近年亦強烈發表個人意見，不單批評政府，亦會投訴各類消費服務，「可能因為教育水平高咗，大家要求高咗……」他形容，「成個社會都係咁，反映香港社會真係一個壓力煲。」 何安達表明不談新政府，但不介意分享對曾蔭權的看法，兩人並肩作戰6年，他直言與曾蔭權有私交，「我估唔係好多老闆會同你講心底話，個人同工作感受佢都肯講……」他無回應曾蔭權是否好老闆，只說好老闆需要有少少權術，「佢身邊乜人都有，要有唔同角色嘅人……」他笑言，「若個個都林鄭(政務司長林鄭月娥)咁樣，十日就全香港火燭啦；個個都(前教育局長)孫明揚咁，點幾百年都點唔著個火水爐啦！」   與曾蔭權有私交 自言角色如老婆  曾蔭權出名EQ差，何安達自言心戰室中人其中一個角色，是為他做心理輔導，「即係有時俾佢發洩下、呻下，有時等佢眼界闊啲……我哋做嘅有少少老婆嘅角色，佢老婆帶唔到佢出街睇嘢，例如帶佢去睇《志明與春嬌》……」 作為特首公關顧問的何安達說，他們的另一職責，「係話俾特首知咩係popular(受歡迎)，咩係unpopular(唔受歡迎)，但我哋覺得有啲嘢unpopular，佢覺得應該一定要做，唔做會有負佢作為特首嘅職責」，其中一例是08年擴大問責制，即曾蔭權自言是其民望下跌的分水嶺，「佢覺得普選嚟緊，如果特首冇政治班子，根本做唔到，美國總統選一屆請3千個政治委任嘅人，我哋講30人，啲人亦嫌多，我哋(特首)仲要冇政黨背景，政府工具箱冇票、冇媒介(支持)，所以要自己班子，佢在任呢5年冇咪冇囉，冇所謂，但佢在任都唔去做，跟住嚟緊更加唔使做，但依家睇到反彈好大……」 推不受歡迎政策撼頭埋牆 他再舉其他被視為不受歡迎的政策，「第二個撼頭埋牆係改稅制，開徵銷售稅攞出嚟講，佢覺得30年後人口老化，依家稅基太窄有問題，任何一個醒啲嘅政治人都唔會攞呢啲題目出嚟做……」曾蔭權於08年建議增加生果金但引入資產審查，亦是另一「撼牆」例子。至於一些受歡迎的政策如復建居屋，曾蔭權卻遲遲不做，「居屋梗係好popular啦，但佢當時有幾個考慮，政府唔係驚樓價升太快，而係驚爆煲，尤其當時講緊金融危機，歐債開始，佢諗緊樓價要平穩，如果動作一多咗過咗龍，就變咗爆煲，嗰下政府控制唔到……」   曾蔭權於07年挾高民望連任，但任期末段因接受富豪款待及外訪事件，令其聲譽一鋪清袋，對於公眾對曾蔭權的評價是否不公道，何安達引述諾貝爾經濟學獎得主Daniel Kahneman在《Thinking,Fast and Slow》書中所說，公眾是以最近的記憶來作決定或評價，「最近大家聯想佢坐遊艇，社會唔接受佢同富豪太近，評價就係咁，所以冇話唔公平，但如果有人做問卷將問題逐樣寫番晒出嚟，有背景下才答問題，可能對佢評價會高啲，但冇人會咁做民調！」 何安達將於月中舉家外遊，展開為期1個月的美加之旅，返港後將重操故業開設公關顧問公司。