真假政經 - 王慧麟
誠信
(2012年07月17日)

做公職人員是否需要比白紙更白，即係要問：是否要聖人至可以從政呢？我唔知。 最近美國總統選戰，同香港一樣，玩誠信。共和黨之羅姆尼，呢個星期陷於苦戰，因為佢又係衰誠信。 奧巴馬陣營最近出招好狠。本周初忽然有美國證監之文件指出，羅姆尼並無好似自己所講，響1999年離開Bain Capital。呢些文件指，羅姆尼其實響2002年，仲管理緊Bain Capital。 傳媒大譁：第一，羅姆尼一直誓神劈願，99年2月之後，退出Bain Capital，專心搞冬季奧運。假如佢真係幕後掌控，唔單只呃了公眾，又呃了證監。 第二，Bain Capital響99年之後，收購一些公司，並將呢些公司的服務外判，拆骨兼炒人。換言之，羅姆尼唔係創造就業的英雄，而是專炒人魷魚的幕後黑手，同佢依家高舉「job王」之形象，完全相反。 奧巴馬叫陣，要羅姆尼解釋清楚，因為涉及到誠信的問題。 當然，羅姆尼一口否認。但點都好，死火，中伏。 美國民調話，奧羅兩人，各有46%支持。不過，我素來認為，要參考「政治期貨」市場之價格。奧巴馬連任成功的比率，仍然超過五成，本月暫時之阻力位響56.5%，最近一周就在55%至55.5%之間徘徊，成交淡靜，似乎莊家無受醜聞事件影響而將價格抽上，仍維持住六月之高位，顯示投資者覺得，奧巴馬連任，仍然穩陣。民調唔會輸身家，政治期貨會，所以我比較信投資者的眼光。   倫敦大學亞非研究學院法律系博士/周二刊登